गुरुवार, अगस्त 27, 2009

Mere Mehboob Mere Dost Nahin Ye Bhi Nahin...Mukesh non filmi nazm

Click here to read Hindi Translation of this nazm in devnagari script.

Pichli post mein maine baat kee thi Mukesh ki gaayi is ghazal जरा सी बात पे हर रस्म... kee.aaj usee elabam kee vo najm pesh hai jisakee khoj karate karate aakhirakaar is kaiseT tak pahunch paaya thaa. tab mai inTar me tha . gajalo me dilachaspee jab se baDhee thee, vividh bhaaratee ka ek kaaryakram meree roj kee dinacharya ka abhinn ang ban gaya thaa. vo kaaryakram tha rang tarang jo us jamaane me din ke saaDhe baarah baje aata thaa. aur esee hee ek dupaharee me transistor aan karane ke baad doosare kamare se mukesh kee aavaaj me ye panktiyaa sunee to man ThiThak sa gaya tha...।

na jaane kyoo ye panktiyaa dil me, pooree najm se prthak apana ek alag astitv hee bana gee. aur baraso baad bhee jab-jab vakt ne , jindagee ke mukaam par akela chhoDa to mainne khud ko apane aap se yahee kahate paayaa.
mere mahaboob, mere dost nahee ye bhee nahee
meree bebaak tabiyat ka takaaja hai kuchh aur..
aur shaayad usee kuchh aur kee taalaash aaj bhee badastoor jaaree hai...

is najm ko likhane vaale the shaukat jayapuree saahab jinake baare me muze koee khaas jaanakaaree nahee hai sivae is baat ke ki ve aThaarahavee shataabdee ke ant me ye urdoo shaayaree ke kShitij par chamake. 1916 me shaukat saahab ka intakaal huaa. par kamaal dekhe ki unake gujarane ke 40-50 saal baad, unakee shaayaree ko mukesh ke aalaava talat mahamood aur manna De saahab sareekhe mahaan gaayako ne apanee aavaaj dee.
ye najm 1968 me muralee manohar svaroop ke sangeet nirdeshan me sangeetabaddh kee gee. tabale kee halkee-halkee thaap ke saath baakee saaj sanyojan kuchh is tarah kiya gaya ki shrota ka dhyaan is najm ke bolo se bhaTake nahee.


haa.N mai.n dIvaanaa huu.N chaahuu.n to machal sakataa huu.N
khilaavat-e-husn ke kaanuun badal sakataa huu.n
khaar to khaar hai.n a.ngaaro.n pe chal sakataa huu.n
mere mahabuub mere dost nahii.n ye bhii nahii.n
merii bebaak tabiiyat kaa takaazaa hai kuchh aur


isii raftaar se duniyaa ko guzar jaane duu.N
dil me.n ghuT ghuT ke tamannAo.n ko mar jaane duu.N
terii zulfo.n ko sar-e-dosh bikhar jaane duu.N
ek din chhiin luu.n mai.n azamat-e-baasil kaa junuun

mere mahabuub mere dost nahii.n ye bhii nahii.n merii bebaak tabiiyat kaa takaazaa hai kuchh aur

to.D duu.N to.D duu.N mai.n shaukh se duniyaa kaa khusoom
aur bah jaaye yuu.n hii nafz-e-zaarosIm kaa khuun

gairat-e-ishq ko manzuur tamaashaa hai yahii
merii fitarat kaa mere dost takaazaa hai yahii

Do you like this nazm. If your answer is in affirmative do give your views and comments here.

मंगलवार, अगस्त 25, 2009

Gulzar's, BIT Mesra aur wo pyara sa nagma...

Pichhle hafte yani 18 August ko Gulzar sahab ka 73 van janmdin tha. Waise to Gulzar ki baatein 'Ek Shaam Mere Naam' par hoti hi rahti hain aur is baat ka praman hai ki ye un se judi is blog ki 25 th post hai. Mere hindi film sangeet ke prati aaranbhik jhukav mein is shakhs ka mahti yogdaan raha hai. College jeevan ke kitne hi rangeen aur ekaaki lamhe unke geeton ke sath kate hain. Aisa hi ek lamha tha aaj se kareeb bees varsh poorv ka jise aaj is avasar par aap sab se bantane ki ikchha ho rahi hai.

Baat 1990 ki hai. Hamein engg. college mein gaye huye 6 mahine beet chuke the yani yoon kahen ki shuruaati do teen mahinon vali ragging ka phase samapt prayah ho gaya tha. Ghar se nikalane ke bad ki pahali pahal aajadi ka asali svad chakhane ka yahi samay tha. yani ab ham aaram se kanlej hanstal se ranchi ke firayalal ke chakkar laga pa rahe the. fursat ke lamahon mein padaee ke aalava naee naee balaon ki vishishtataon ki charcha mein bhi khoob aanand aane laga tha. ऍse mein pata chala ki march ke mahine mein mesara ka salana mahotsav jise vahan beetotsav (Bitotsav) kaha jata hai aaranbh hone vala hai.

Ab apan in karyakramon mein hissa-vissa to nahin liya karte the par sare karyakramon ko dekhne ki ikchha jaroor hoti thi. Aur sabae adhik intazar rahta tha is utsav ki samapti par hone vale sangeet mahotsav ka jis mein poore archestra ke sath pashchaty aur hindi donon tarah ke sangeet ka karykram huaa karta tha. March mahine ki vo raat mujhe kabhi nahin bhoolti. Bahut sare geet gaye ja chuke the par vo lutf abhi tak nahin aaya tha jiski apeksha liye ham khule aakash ke neeche maidan mein do ghante se baithe the. Tabhi hamare senior batch ki do chhatraon ke naam stage par udghoshit kiye gaye. Ham sab ne socha koee yugal geet hoga. Aur fir shuru huaa aasha taee ka gaya vo geet jiske prabhav se main varshon mukt nahin ho paya.

Vo geet tha Gulzar ka likha huaa aur pancham ka sangeet baddh katra katra milti hai, katra katra jine do... Bhavna Bhandari aur B. Sujata ki jodi ne Asha taee ke is ekal geet ko mil kar itani khoobsoorti se nibhaya ki ham raat bhar pagalon ki tarah is geet ko gunagunate rahe.

Agle din chhutti thi par is geet ko fir se sunne ki ichchha itni balvati thi ki nashta karane ke theek baad agali bas se Ranchi is film ki casette kharidane ke liye nikal pade. Ab casette to din tak hostal mein aa gaee par agali samasya thi ki ise bajaya kaise jaye kyoonki mere pas us waqt koee taperecorder to tha nahin. Lihaza baari baari se padosiyon ke daravaje thak thakaye gaye taki ek adad teparikardar udhari par manga ja sake. tisare ya chauthe daravaje par hamari iltija rang laee aur char ghante ke liye hamein taperecorde mil gaya.Phir to ye geet ghanton rewind kar kar ke bajaya gaya. Gulzar ke prati mera anurag aise kaee anubhavon ki badaulat mere dil mein satat palata badhta raha hai. Khair baat ho rahi thi qatra qatra ki...




Darasal geet ko itna khoobsoorat banane mein Gulzar, Pancham aur Aasha ji ki tikadi ka barabar ka hath hai. Kya dhun banaee thi pancham da ne aur apani pyari chahakti chhanachhanati aavaj mein kitani khoobsoorti se nibhaya tha Asha ji ne. Pancham to sangeet mein nit naye prayog karne mein mahir rahe hain. Is geet mein Pancham ne Asha ji ki aavaj ka istemal multi track recording mein is tarah kiya hai ki poore geet mein do aashayen ek sath sunaee deti hai.

To aaiye Gulzar ke likhe shabdon ko mahasoos kijiye Pancham ki adbhut svaralahariyon aur Asha ji ki bahati aavaj mein ...

Track details eSnips Social DNA



qatra qatra milti hai
qatra qatra jine do
zindagi hai, zindagi hai
bahne do, bahne do
pyasi hoon main, pyasi rahne do
rahne do ...

kal bhi to kuchh aisa hi huaa tha
neend mein thi tumne jab chhuaa tha
girte girte bahon mein bachi main
sapane pe panv pad gaya tha
sapnon mein rahne do
pyasi hoon main pyasi rahne do

tum ne to aakash bichhaya
mere nange pairo.n mein zamin hai
pa ke bhi tumhari aarazu hai
ho.. shayad aisi zindagi hasin hai
aarazu mein bahne do
pyasi hoon main ,pyasi rahne do
rahane do, na ...

qatra qatra milti hai....

halke halke kohare ke dhuyein mein
shayad aasaman tak aa gayi hoon
teri do nigahon ke sahare
dekho to kahan tak aa gayi hoon
kohare mein bahne do
pyasi hoon main, pyasi rahane do
rahne do, na ...

qatra qatra milati hai.....


Gulzar ka likha geet to aapane sun liya par unaki likhi najmon ya gajalon ko aapane nahin suna to fir Gulzar ke shabd chitron mein doobane ka mauka to kho diya aapane. isaliye chalate chalate unase judi meri tin pasandida kadiyan bhi padate sunate jaiye. main janata hoon ki agar aapane inhen pahale nahin suna to bar bar jaroor sunana chahenge...


Gulzar sahab ke janmadin par meri yahi kamana hai ki ve isi tarah apane kalam ki vilakshanata se mamooli shabdon mein bhavon ke jaduee rang bharate rahein aur hamein yoon hi apani rachanaon se achanbhita, mudit aur nishabd karate rahen...aameen





Click Here to read this post in Hindi devnagari script.

Click Here to post your comment on this post.

गुरुवार, अगस्त 13, 2009

Yadein Gulshan Bawra Ki : Sapna Mera Toot Gaya Tu Na Raha Kuch Na Raha

Gulshan Bawra nahin rahe..pichhale saptahant TV par ye khabar suni to sattar aur assi ke dashak mein unke rache vo rasile-surile geet ekadam se ghoom gaye jinhen sunkar hamari peedhi pali aur badi huee hai. Aaj ki ye pravishti Gulshan Mehta ki zindagi ke safar mein jhankne ka ek prayas hai jinke bavare mastamaula vyaktitv ne apni kalam ke jariye karodon bharatiyon ko unke geeton ko gunagunane par majaboor kar diya.

Lahore se kareeb 30 km door Shekhpura namak qasbe mein janme is balak ne bachapan mein hi vibhajan ke dauran relgadi se bharat aate waqt apne pita ko talavar se katate aur maan ko sir par goli lagte dekha tha. Bhaee ke sath bhagkar ye Jaipur aa gaye jahan bahan ne inki paravarish ki. Par gaur karne ki baat ye hai ki is bhayavah trasadi ki yantrana ko jhelane vale Gulshan Bawra ne ise apani zindagi apane vyaktitv aur apane likhe geeton par kabhi havi nahin hone diya. Baad mein bhaee ko dilli mein naukari milane ki wajah se vo dilli chale gaye. 1955 mein railway mein clerk ki naukari milne par ye munbai aa gaye.

Likhne ka shauq Gulshan Bawra ko bachpan se tha. Bachpan mein maan ke sath bhajan mandali mein shirqat karne ki wajah se bhajan likhne se unke lekhan ka safar shuru huaa jo college ke dinon mein aate aate aashanuroop roomani kavitaon mein badal gaya. Isliye Mumbai mein naukari karte waqt fursat milte hi unhonne sangeetakar jodi Kalyan ji Anand ji ke daftar ke chakkar lagane nahin chhode. Gulshan Mehta ko pahli safalta isi jodi ke sangeet nirdeshan mein Ravindra Dave ki film Satta Bazar (1957) mein mili jab unka likha geet .....

tumhen yad hoga kabhi ham mile the,mohabbaat ki rahon mein mil kar chale the
bhula do mohabbaat mein ham tum mile the, sapna hi samjho ki mil kar chale the

...(jise hemant da aur lata ji ne apana svar diya tha) behad lokapriy huaa tha. is film ke vitrak Shantibhaee Patel ne jab 20 saal se kam umr vale is navodit geetakar ko bhadakile rang ke kapadon mein dekha to unhein vishvas nahin huaa ki ye ladka aise gambhir geet ki rachna kar sakta hai . tabhi se unhonne Gulshan Mehta ka namakaran Gulshan Bawra kar diya. Aagami kuchh saal Gulshan ji ke liye mashakkat vale rahe aur in salon mein ve kaee filmon mein abhinay kar apna gujara chalate rahe. Waise unke jis geet ne poore bharat me unke naam ka sikka jama diya uske liye sara shrey unki goods clerk ki naukari ko dena uchit jan padta hai.

Darasal railway ke maa avahak vibhag mein Gulshan Bawra aksar punjab se aaee gehoon se ladi boriyan dekha karte the aur vahi unake man mein in panktiyon ka sanchar kar gaee

mere desh ki dharti,mere desh ki dharti sona ugle
ugle hire moti, mere desh ki dharti..

Jab unhonne apane mitr Manoj Kumar ko ye panktiyan sunaeen to usi samay manoj ne ise apani film upakar ke liye chun liya. Ye geet unhen 1967 ke sarvashreshth geet ka filmfare puraskar dila gaya.

Waise sahi mayene mein upkar ke is geet ne Gulshan Bawra ko bharat ki janata se jod diya. Sattar ki shuruaat mein sabse pahale 1974 mein film hath ki safaee mein lata ji dvara gaye unake geet tu kya jane bewfa.. aur vada karale sajana... behad lokapriy rahe. Phir 1975 mein aaee film zanzeer mein unke geeton divane hain divanon ko na ghar chahiye... aur yari hai eeman mera yar meri zindagi.... ne poore desh mein dhoom macha di. in donon hi filmon ka sangeet Kalyan ji Anand ji ne diya tha.

Phr aaya Gulshan Bawra aur Pancham ki geet sangeetakar jodi ka daur. daraasal Gulshan Bawra ke geeton se mera pratham parichay sattar ke uttarardh mein huaa jab geet sangeet sunae ki ruchi man mein jagrat ho chuki thi. Is dauran is jodi ki jo bhi safal filmein aaeen vo sabhi mainne cinema ke parde par dekhin. Lazimi hai ki is daur mein unake likhe geet meri juban par sabase jyada rahte hain.

Sabse pahale zikra karna chahoonga 1975 mein aaee film khel khel ka jiske takareeban sare geet mujhe behad priy the. Bachapan mein jab antyakshari khela karte to pahali bar kisi ka 'h' aaya nahin ki vo shuru ho jata tha

hamne tumko dekha tumne hamko dekha aise
ham-tum sanam saton janam milte rahe hon jaise

aur mamala yahin khatm nahin hota tha . mukhade ke baad sare bade chhote bachche mil kar antara jaroor gate the

baste-baste bas jayegi is dil ki basti
tab hi jivan mein aayegi pyar bhari masti
baste-baste bas jayegi is dil ki basti
hay tab hi jivan mein aayegi pyar bhari masti
hamari dastan kahega ye jahan ,ho hamari dastan kahega ye jahan
hamne tumako dekha tumane hamako dekha aise ..
.
aur isi film ka vo geet use kaun bhool sakata hai bhala

khullam-khulla pyar karenge ham donon
is duniya se nahin darenge ham donon
pyar ham karate hain chori nahin
mil gaye dil zora-zori nahin
ham vo karenge dil jo kare
hamako zamane se kya

Tab tak pyar vyar ka matalab bhi thik pata nahin hota tha. Ab ise gulshan ji ke bavare shabdon ka kamal kahein ya asha kishor ki zabardast jugalbandi, is geet ko gane mein itani khushi milti thi ki aaj bhi ise gunagunate waqt aisa lagta hai ki mainne apni zindagi ke das pandrah varsh ghata liye hon.

Saal beette gaye Gulshan ek ke bad ek hit geet dekar hamein kabhi muskurane,kabhi hullad machane aur kabhi sanzeeda hone ka mauka dete gaye.1978 mein aaee film kasme vade ka ye geet ho

aati rahenge baharen jati rahengi baharen
dil ki najar se duniya ko dekho ,duniya sada hi hasin hai

ya 1979 mein aaee film jhootha kahin ka ye geet
jivan ke har mod para,mil jayenge hamasafar
jo door tak sath de,dhoondhe usi ko nazar

ya fir mein satte par satta (1982) ka shirshak geet

dukki pe dukki ho ,ya satte pe satta
gaur se dekha jaye, to bas hai patte pe patta, koee farak nahin albaatta..


ye sare geet hamne us zamane mein behisab gunagunaye. assi ke dashak mein bhi
Sanam teri kasam
kitne bhi tu kar le sitam,hans hans ke sahenge ham
ye pyar na hoga kam, sanam teri kasam

Jawani
tu rutha to main ro doongi sanam , aa ja meri bahon mein aa ...
aur Agar tum na hote ke liye unake likhe geet behad charchit huye . is film ke shirshak geet ke antare ko dekhiye

hamein aur jine ki chahat na hoti agar tum na hote
hamein jo tumhara sahara na milta,bhanvar mein hi rahte kinara na milta
kinare pe bhi to lahar aa duboti, agar tum na hote...

Gulshan Bawra ki khasiyat thi ki vo apne geeton mein bina jyada lachchhedar kavyatmak bhasha ka prayog kiye huye apani baaton ko shrotaon tak sahajta se pahunchana janate the. Wo kaha karte the ki geet vyakaran ki ashuddhiyon aur vaicharik gadabadiyon se pare hone chahiye. Ek sakshatkar mein unhonne aavara film mein shailendra ke likhe lokapriy geet ke bare mein kaha tha ki

aavara hoon aavara hoon ya gardish mein hoon aasman ka tara hoon ki jagah
aavara hoon aavara hoon main gardish mein bhi aasman ka tara hoon
likhna jyada behatar hota kyoonki gardish shabd jivan mein aaye sangharsh ya uthalputhal ka prateek hai aur is avastha ko taron se jodana prakrtik satya ke vipareet hai. Sirf geet ke meter ko durust rakhane ke liye prakrtik aur sansarik tathyon se chhed chhad nahin karani chahiye.

Apne chalis sal ke lanbe sangeet ke safar mein Gulshan Bawra ne matr 250 geet likhe jisamein 150 pancham aur karib 70 kalyan ji anand ji dvara sangeet nirdeshit filmon ke liye likhe gaye. gulshan ji ka kahna tha ki

Zindagi mein jyada kaam karane ya kaam pane ke liye zaddozahad karne ki unaki pravriti nahin rahi. isaka ek karan hai ki meri koee santan nahin hai. main tab ek film ke liye 90000 rupaye parishramik leta tha jab mumbai mein ek ghar ki kimat 65000 rupaye huaa karati thi. na mainne apane parishramik se kabhi samajhauta kiya, na apane kam ki gunavatta se...

Aaj jabki Gulshan Bawra hamare beech nahin hai mujhe khel khel mein likha ye geet baraha yad aa raha hai jisemein unhonne likha tha

sapana mera toot gaya
are vo na raha kuchh na raha
roti hueen yaden milin
bas aur mujhe kuchh na mila




Ye geet mujhe aasha ji aur pancham ka gaya sabse behatareen yugal geet lagta hai. is geet ke sath hi chhod raha hoon aapako Gulshan Bawra ji ki in yadon ko aatmasat karane ke liye.... .

Waise unase judi kuchh yaden agar aapake pas hain to jaroor bantein ...

Click Here to read this post in Hindi devnagari script.

Click Here to post your comment on this post.

सोमवार, अगस्त 10, 2009

Rabbi Shergill ka udaas karta Punjabi lokgeet Chhalla with translation

Kuchh geet aise hote hain jinki bhavanayen bhasha ki deevaron ko langhti kis tarah hamare zehan main sama jati hain ye hamain pata hi nahin lagta. Baat pichhale December ki hai main har sal ki tarah hi apani Varshik Sangeet Malaon ke liye saal ke shreshth 25 geeton ka chunav kar raha tha aur tabhi mainne is punjabi lok geet ko pehli baar suna aur bina shabd ke arth jane hi ise sun kar man bhari ho gaya. Aakhir Rabbi Shergill jab gate hain to unki aavaj aur hamare dil ke beech shabdon ka ye pul na bhi rahe to bhi fark nahin padta.

Mainne is geet ko apne pratham panch geeton main dal bhi diya par baad main ise apni soochi se isaliye hatana pada kyonki is geet ke bol aur arth mujhe tab upalabdh nahin ho paye the. Phir kuchh din pahle savan ke is mausam ne 'chhalle ' ki yad fir se dila di. To fir main chal pada apani usi talash main auraakhirkaaris chhalle ki gutthi sulajhati gaee...

Isse pahle ham Rabbi Shergilll ke album avengi ja nahin (Avengi Ja Nahin) yani 'aaogi ya nahin' ke is geet ki charcha karen ye samajhana jaroori hai ki punjabi lok geet ka ye lokapriy roop 'chhalla' kab gaya jata hai?
Jaisa naam se spasht hai 'chhalla lokageet' ke kendr main vo agoonthi hoti hai jo premika ko apne priytam se mili hoti hai. Par jab uska premi door desh chala jata hai to vo apane dil ka haal kisse baataye ? Haan ji aapne sahi pahachana ! aur kisse ? Usi chhalle se jo uske sajan ki di gaee ekamatr nishani hai. yani 'chhalla lokageet' chhalle se kahi jane vali ek virahani ki aap beeti hai. Chhalle ko kaee punjabi gayakon ne samay samay par punjabi filmon aur albums main gaya gaya hai. Iss tarah ke jitne bhi geet hain unamain Reshma, Inayat Ali, Gurudas Mann aur Shaukat Ali ke version kafi mashahoor huye. par mujhe to Rabbi ka gaya huaa ye chhalla lokageet sabase jyada pasand hai. to aaiye dekhen kya kah rahe hain Rabbi apane is 'chhalle' main..



Ye agoonthi ab mere vash main nahin rahi ! dekhiye na ye meri baat hi nahin sunti hai. Ab to lagta hai ye mujhse jyada meri maan ki sunane lagi hai. Pata nahin is par kisne jadu tona kar diya hai.

chhalla vas nahin o mere he
chhalla vas nahin o mere he
chhalla vas nahin o mere
chhalla vas nahin o mere
chhalla vas meri man de
ghalle geetan jange
ve gal sun chhalaya
haye kitan kis is te toona

Mujhe to ye chhalla nalakoop se nikalati huee us dhar ki tarah lagta hai jo na jane kis or bah jaye. vaise mera pyar bhi to teri koee khabar na aane ki vajah se is dhara saman hi ho gaya hai jiski dasha aur disha ka ab to mujhe bhi pata nahin.
O mere prem ke pratik chhalle meri baat sun ! Kya tu nahin janata ki ab is pyar se bhare mere komal hriday main ik kanta ug gaya hai jo rah rah kar mujhe tees raha hai.

oye chhalla bambi da pani hin
chhalla bambi da pani hin
chhalla bambi da pani
kitthe bahze na jaani
asan khabar ko na jaani
ve gal sun chhalaya, ve gal sun chhalaya
teri beri ik ugaya aye kanda


Aaj apne is gunthi lambi choti ko dekha to isi main mujhe tu nazar aaya aur usi svapnil si avastha main mainne tujhe choom liya. Main janti hoon ki meri chahaten andhi ho gaee hain par mainne vahi kiya jo mere hriday ne mujhe karne ko kaha. Kya mainne kuchh ghalat kiya Chhalle ? Agar aisa hai to chhalle tu mujhe jo saja dena chahata hai de le.

chhalla gut ik lammi hin
chhalla gut ik lammi hin
chhalla gut ik lammi
asan supane si chummi
hoi niyat si anni
asan dil di si manni
ve gal sun chhalaya
hoon de lai jehadi deni ai saja

Kabhi kabhi to lagta hai ki Chhalle tu us akele khade peepal ke ped ki tarah hai jiske oopar to bhagavan ka vas hai aur jo niche is vishal dharati ko bhi sanbhale huye hai. tu soch raha hoga ye kaisi samanta hai? Hai na chhalle ! Us pipal ke ped ki tarah tu bhi to nahin janta ki is dharati roopi mere dil main pyar ki jade kitani gaharaee tak samaee huee hain.

oye chhalla bodik kalla ha
chhalla bodik kalla ha
chhalla bodik kalla
unde fad jaye palla
thalle dharat ute allah
ve gal sun chhalaya, ve gal sun chhalaya
are jandi a kinni dunghiyan jadan
is gal da os khud noon nahin pata

Chhalle mera dil bhatak raha hai. Man main shankayen utpann ho rahi hain. Mujhe to tu aajakal vaisi amiya ke jaisa lagne laga hai jo kabhi nahin pakin. Lagta hai mujhe sadhu santon ke pas jana padega jo mera ye unmat chitt shant kar saken. Ab to dil ko sukoon dene ka ek hi rasta bacha hai un beete lamahon ko yaad karne ka jo toone aur mainne ek sath bitaye the...

chhalla vas nahin mere
chhalla vas meri man de
chhalla vas meri .... de
chhalla ambiyan kachiyan
matta de koee sachiyan
lai ye lekhe jo bachiyan
vo tairi meriyan ghadiyan
ve gal sun chhalaya


chhalla bodik kalla
unde fad jaye palla
thalle dharat ute allah
ve gal sun chhalaya, ve gal sun chhalaya,
ve gal sun chhalaya, ve gal sun chhalaya...


(Mera punjabi ka gyan seemit hai. Punjabi shabdon ke arth dhoondh kar is lok geet main chhupi bhavanaon ko apani soch ke hisab se samajhane ki koshish ki hai. agar lafzon ko likhne main truti rah gaee ho to krpaya batayein.)
Rabbi ki gayiki hamesha ki tarah bemisal hai. Unke is geet mein vady yantron ka prayog seemit kintu marak hai. Shuru ke do antare ke baad jis tarah se unhonne geet ka scale badla hai vo sunne layak hai. Oonche suron ke madhyam se vo premika ki udasi, bekali aur akelepan ko us oonchaee par le jate hain ki shrota ki aankhen ashrusikt huye bina nahin rah patin. Kam se kam mera to yahi anubhav raha hai baki aap khud ise sun kar dekhein...




Ek Shaam Mere Naam par Rabbi Shergill




Click Here to read this post in Hindi devnagari script.

Click Here to post your comment on this post.

मंगलवार, अगस्त 04, 2009

Memoirs of Kishore Kumar on his 80 th Birthday !

Aaj Kishore Da Ki Janma titthi hai. Unki Zindagi se judi kayi baton aur sangeet ke safar par do saal pehle maine ek srinkhla ki thi.

Aaj uske sampadit anshon ko repost kar raha hoon.

Poora lekh Hindi mein padhne ke liye neeche de gayi link par click karein.






Click Here to read this post in Hindi devnagari script.

Click Here to post your comment on this post.

शनिवार, अगस्त 01, 2009

Aankhein Ladane se Parhez to Nahin to Suniye Naa : Aye Husn e Lalafaam Zara Aankh to Mila...

Pichhli post mein mainne jikr chheda tha ek aisi ghazal ka jise mere liye yadagar banane ka shrey Ghulam Ali se jyada Abhijeet Savant ko jata hai. Par aaj ki ye behad roomani ghazal, Ghulam Ali ki gaee meri pasandida ghazalon men se ek hai. Jab bhi ise sunta hoon mood men ranginiyat khud-b-khud sama jati hai.

Sabse pahle is ghazal ko sunane ka mauka 1996 men mila tha jab main Roorkee University ke chhatravas men raha karta tha. Shighra hi mainne ise ek blank cassette men ise record kar apne paas surakshit kar liya tha. Kuchh salon tak to ye ghazal baraha suni gaee aur fir sidi yug aate hi baki kaisaton ki tarah kahin kone men dubak gaee. Bad mein ek mitra ki sahayta se mujhe ye digital form mein mujhe mili.

To chalen ab is ghazal ke sunein Ghulam Ali ki aawaaz mein. Ghulam Ali sahab matle ki shuruaat kuchh yoon karate hain..




aye husn e lalafam zara aankh to mila
khali pade hain jaam zara aankh to mila

Waise to sach bataoon janab to 'jaam' se apana rishta door-door tak ka nahin hai par agar chehre par pyari si lali liye koee sundari apane nayanon se nayan ladaye to kuchh madahoshi to dil par chhayegi na! Waise bhi shayar ki chale to aankhen ladana bhi bhakti ka ek roop ho jaye. ab yahi sher dekhiye...

kahte hain aankh aankh se milana hai bandagi
duniya ke chhod kam zara aankh to mila


Bilkul ji ham to taiyar hain bas boss ko bagal ki cabin se hatava dijiye aur ek baala samane ki table par virajmaan karava dijiye fir dekhiye hamara bhakti bhav :)

kya vo na aaj aayenge taron ke sath sath
tanahaiyon ki sham zara aankh to mila


Hmmm gar vo chand jaise honge to jaroor aayenge taron ke sath varna to aisi pariyon ke sath aksar unake amavasi mitr hi hote hain jo aashikon ko apani sham, gam aur tanahaee men bitane pe majaboor kar dete hain!

saaki mujhe bhi chahiye ik jam e aarzoo
kitane lagenge dam zara aankh to mila

uff ye to julum hai bhaee aankhon par...aankhon se man ki aarzu to padane ki to baat suni thi par shayar sagar to aankhon se hi bhavanaon ka mol poochhana chahate hain !

hai rah e kahakashan men azal se khade huye
sagar tere gulam zara aankh to mila


Bataiye Sagar sahab ne to zindagi bhar ki pratiksha kar li is aakash ganga ko niharate niharate aur vo hain ki itani gulami ke baad bhi nainon ka ikararnama nahin de rahin. Purane zamane ke logon ki baat hi alag thi. Ghazab ka dhairy tha logon ke pas aur aaj...!

Ghulam Ali apani gayiki aur bolon ki badaulat mahaul men roomaniyat to late hi hain, sath hi sangeet sanyojan bhi man ko aakarshit karta hai. Ghazal, table ki thap aur bansuri ki tan ke beech se nikalati huee nikharati chali jati hai is tarah ki man khud gunagunane ko karne lagta hai..