गुरुवार, सितंबर 24, 2009

Hemant BrijWasi in ZEE Little Champs : Jab Punjabi lokgeet ke is tukde ko sun aankhe geeli ho gayin Asha Tayi Kee !

Navaratr shuru ho gaye hain aur kal Eid sollaas manaee ja chuki hai. Parv tyoharon ke is masti bhare daur mein blog par bhi masti ka rang chadana lazimi hai na. Aaj jo mood man mein tari hai uska poora shrey jata hai Mathura ke gyarah varshiy balak Hemant Brijvasi ko. Hafte bhar se hemant ki aavaj kanon mein goonj rahi hai. 11 September ki us yadagar rat ko Zee TV Little Champs par khud Asha taee padhari thin. Poore karyakram mein ladakiyon ko Asha ji aur ladakon ko Pancham ke gane gane the. Ab pancham ki bhari aavaj aur unaki urjatmak shaili ko das barah saal ke bachchon dvara nibha pana tedhi kheer tha. Phir bhi sab pratibhagiyon ne achchha prayas kiya, par Zamane Ko Dikhana Hai film mein pancham dvara gaye geet dil lena khel hai diladar ka, bhoole se naam na lo pyar ka... ki hemant dvara prastuti itani damdaar thi ki Asha taee tak ko kahana pad gaya ki "aapane to burman sahab se bhi behatar tarike se is geet ko nibhaya".

Poore karyakram mein ek aur baat kamal ki thi aur vo thi gayakon ko jabaradast support deta huaa manabhavan orchestra. Waise bhi Zee TV ke sangeet karyakramon mein kayee salon se manje huye saazkaron ko bajate dekhata raha hoon aur Pancham ki dhunon mein to inki vishesh bhoomika hamesha hi raha karati thi. Pancham ke sangeetabaddh geeton ka parshv sangeet unki anoothi shaili ki gavahi deta hai. Darasal tarah tarah ki aawazon ko paramparik aur gair paramparik vady yantron se nikalane mein Rahul Dev Burman ka koee sani nahin tha.


To lautein apne is surile balak ki oor. Hemant ki damdaar prastuti yaadgaar tab ban gaee jab usane geet ke bad Asha ji ko Bulleshah ke likhe soofiyat mein range punjabi lokageet ka vo tukada sunaya.

charkha de mitta diyan dooriyan...........
ho..main kati javaan teri hor piya dooriyan
gad sakhri ra gad sakhri ra ...
gada.. sakh...rira..
gad sakhri ra varan diye kudiye...........
main paiya aur sipahayiye

Sach maniye Hemant ne un chand panktiyon mein li gaee harkaton ne aisa sama bandha ki hajaron darshakon ke sath-sath Asha ji ki bhi aankhen gili ho gaeen aur ve kah uthin

Hemant agar sabase badi kala koee mani jati hai to vo kala hai sangeet kala. Sangeet kala bhagavan ke nazdeek hoti hai. aur tumhara jo gana hai vo bhagavan ke bahut nazdeek hai.
Nau saal ki aayu se apae pita aur guru Hukumchand Brijvasi se sangeet sikhna shuru karane vale Hemant ko shastriy aur soofiyana nagme gane mein maharat hasil hai. Matr do sal sangeet ki shiksha lene ke baad ye balak geeton mein apani aur se jodi huee vividhataon ka is tarah samavesh karata hai manon geet se khel raha hai. Hemant ki aawaaz aur uchcharan ek shishe ki tarah saaf aur spasht hai par uske sath dikkat yahi hai ki vo apni shaili ke geeton se alag tarike ke geeton mein vo kamal nahin dikhala pata. Par shayad aaj ke yug mein iski jaroorat bhi nahin hai. Har gane ke pahale apani jihva ko banke bihari lal ki jayakar se pavitra karane vala ye balak Nusarat aur Asha ji ko apana aadarsh manta hai. Geet sangeet ke aalava cricket bhi khelata hai aur mauka mile to Shahrukh aur Karena ki filmein dekhana bhi pasand karta hai.

To agar aapane us din is prasaran ka aanand nahin liya to ab le lijiye..






Waise is soofi lokageet ko poora sunne ki ichchha aap ke man mein bhi ho rahi hogi. Is lokgeet ko sabase pahale lokapriy banaya tha soofi ke badashah Nusrat Fateh Ali Khan sahab ne aur fir is geet ko naee bulandiyon par le gaye the jalandhar ke punjabi puttar Saleem Shahajada. Badashah aur shahajade dvara is lokageet ki prastuti ko aap tak pahunchane ki shighr hi koshish karoonga.





शुक्रवार, सितंबर 18, 2009

'Dauran-E-Tafteesh ' an interesting portyal of current Problems of Indian Police by Satish Chandra Pandey

Ek Shaam Mere Naam par bahut dinon se kitabon ke bare mein nahin likha tha. Awwal to kitab padhne ki gati behad dheeme ho gayi hai aur doosre agar kisi kitab ki charcha shuru karne par ye nirnay lena bhi kaphi durooh ho jata hai ki iska kaun sa hissa apne pathakon ke saamne laya jaye.


Pichle mahine jab retired IPS officer Satish Chandra Pandey ki apni service life ke dauraan likhi gayi kitaab Dauraan E Tafteesh (During An Enquiry) padhi to yahi samasya samne aa khadi huyi.
Is kitab ke rochak anshon ko apni khud ki raay ke sath apne Hindi blog
'एक शाम मेरे नाम' par teen bhagon mein prastut kiya hai. Asha hai aapko ye teenon kadiyan pasand aayengi. Agar in kadiyon ko padh kar aapke man mein bhi kuch vichar aate hain to avashya comment karein.



इस श्रृंखला की सारी कड़ियाँ


गुरुवार, सितंबर 10, 2009

Jaan Ve Jaan Le Haal E Dil : A melodious & touching song by Rahat, Vishal & Munna

Hindi film sangeet ki trasadi yahi hai ki agar film nahin chaali to kaee bar film ka sangeet achchha hone ke bavjood aam jaanta se door rah jaya karta hai. Pichhaale saal aisi hi ek film aaee thi Haal-e-Dil jisamein kaee nami sangeetkar Vishal Bhardwaj, Anand Raj Anand, Pritam aadi ne film ke vibhinn geeton ki dhunen taiyar ki thin. Ajay devagan ke bhaee Anil devagan ki ye film box office par buri tarah piti jisaka khamiyaza isake geeton ko uthana pada tha.


Iss film mein Vishal Bhardwaj ne Munna Dhiman ke likhen shabdon par ek behatarin composition banaee thi jo Rahat Fateh Ali Khan ki gayiki se aur nikhar gaee thi. Vishal Bhardwaj yoon to aksar Gulzar ke bolon pe apana hunar dikhlate rahe hain par Munna Dhiman ke sath bhi unki jugalbandi khoob baithti hai.Yaad hai na 2007 mein nishabd film ke geet jis mein pahli bar munna dhiman ki charcha is chitthe par huee thi. Phir pichhaale sal 'U ME aur HUM' mein bhi ye jodi kuchh had tak safal huee thi. Dil ka haal kahte huye is nagme ko apane bolon, sundar sangeet sanyojaan aur Rahat Fateh Ali Khan ki bemisaal gayiki ki vajah se main is jodi dvara rachi gaee ab tak ki sabase nayab composition manta hoon.

Darasal munna is geet ki roomani panktiyon mein ek aisi gaharaee late hain jo is geet ka star ek doosare dharatal par le jata hai. Misaal ke taur par in panktiyon ko dekhen..

aaja teri aankhon se khvab khvab gujroon main..
aaja tujhe hathon pe
kismaton sa likh loon ve..
aaja tere hothon se baat baat nikloon main..

aaja tere kohare mein dhoop ban ke kho jaoon..

Aur fir kitna adbhut hai Vishal Bhardwaj ka sangeet sanyojaan ! Mukhde ke theek pahle taal vadyon ki thap se man jhoom hi raha hota hai ki Rahat ka ruhani svar ubharata hai aur man geet mein ram sa jata hai. Vishal geet ke pichhe ki beats ko bina kisi jyada chhed chhad ke chalate rahne dete hain. Phir interlude mein guitar ka unaka prayog dhyan kheenchta hai. Waise bhi Rahat ka soofi andaj hamesha se dil ko chhoota raha hai. to aaiye pahle sunen Rahat ko..

Get this widget eSnips Social DNA

jaan ve jaan le , haal e dil
jaan ve bol de , haal e dil
aaja tere sine mein sans sans pighloon main
aaja tere hothon se bat bat nikloon main
tu meri aag se raushani chhant le
ye jameen aasaman jo bhi hai baant le
jaan ve jaan le , haal e dil
jaan ve bol de , haal e dil
aaja mahiya aa ja...aaja mahiya aa ja...
bebasiyan aa ja...aaja mahiya aa ja...
din jogi ratan, sab dasiyan aa ja
teri jholiyan paoon ghar galiyan aa ja
aaja mahiya aa ja...aaja mahiya aa ja...
aaja tere mathe pe chand ban ke utaroon main
aaja teri aankhon se khvab khvab gujaroon main
rag rag pe hain tere saye ve, rag rag pe hain tere saye
rang tera chad chad aaye ve rang tera chad chad aaye
jaan ve jaan le , haal e dila...

aaja tujhe hathon pe kismaton sa likh loon main
aaja tere kandhe pe umr bhar ko tik loon main
teri ankhiyon ke do gahane ve teri ankhiyon ke do gahane
firate hain pahane pahane ve firate hain pahane pahane
jaan ve jaan le , haal e dil...
aaja mahiya aa ja...aaja mahiya aa ja...
aaja tere sine mein sans sans pighaloon main....


Rekha Bharadvaj ne bhi is geet ka doosara version gaya hai jisamein antare thodi tabdili ke sath gaye gaye hain. Munna Dhiman ek bar fir usi form mein hain. Vishal ki parshv beats yahan apekshakrit tez hain. Interlude mein guitar ki jagah bansuri bajti sunaee deti hai. Rekha ji ki gayiki ka anootha andaj to hamesha se man ko sohta hai par kul milakar Rahat Fateh Ali Khan vala varsion jyada asar chhodta hai. to suniye Rekha ji ko isi geet mein..

Get this widget Track details eSnips Social DNA

aa ja rakh le
ud tak le aaja rakh le
man ve.. haye.. kuchh kah de
kuchh sun le jaan ve
jaan ve jaan le , haal e dila...
aaja tere kohare mein dhoop ban ke kho jaoon
tere bhesh tere hi roop jaisi ho jaoon
rag rag pe hain tere saye ve, rag rag pe hain tere saye
rang tera chad chad aaye ve rang tera chad chad aaye
jaan ve jaan le , haal e dila...
tu hi meri nindon mein jagata hai sota hai
tu hi mere aankhon ke paniyon mein hota hai
teri ankhiyon ke do gahane ve teri ankhiyon ke do gahane
firate hain pahane pahane ve firate hain pahane pahane




रविवार, सितंबर 06, 2009

Tere utare huye din tange hain lawn mein ab tak : Gulzar's poetry in Nana Patekar's voice

Do saal pahle ek daure par durgapur gaya tha. Sath mein koee sahakarmi na hone ke karan daftar se vapas aakar shamein gujarana kafi mushkil ho raha tha. Aisi hi ek khali shaam ko koee aur vikalp na rahne ki wajah se ek film dekhani padi thi 'Dus Kahaniyan'.

Durgapur ke naye maltiplex ke uhaal mein us raat mere sath matra saat aath darshak rahe honge. Das alag alag kahaniyon ko ek hi sath prastut karane ke is anoothe prayog ke liye kahaniyon ke chunav mein nirdeshak ko jo satarkta bartani chahiye thi, vo nahin ki gaee.

So das kahaniyon mein teen char ko chhodkar baki kisi gat ki nahin thi. Khair ab nabbe rupaye kharch kiye the to main film ko jhelane ke liye majboor tha, par kamal ki baat ye dekhi ki meri pankti mein ek sajjan aaye aur pahali kahani ko aadha dekhane ke bad aisa soye ki sidhe film khatm hone ke bad chupachap uthe aur chal diye. mainne man hi man socha ki jaroor ye banda apani gharawali se trast hoga varna ek meethi neend ke liye itna kharcha karne ki kya jaroorat thi.

Film mein geet bhi damdaar nahin the. Baad mein ek din net par vicharan kar raha tha to ye pata laga ki Gulzar sahab ne iski das kahaniyon ki script padhkar har kahani par ek nazm taiyar ki hai jise film ke alag alag kalakaron ne apani aavaj mein padha hai.

Das kahaniyon ke geeton ke sath hi nikala album to mujhe jald hi mil gaya par acharaj is bat ka huaa ki film mein in behatarin nazmon ka kisliye istemal nahin kiya gaya. Shayad samay ki kami ek wajah rahi ho.Is blog par is album ki apani char pasandida najmon mein se teen to aapko suna chuka hoon. To aaiye aaj karein kuchh batein 'gubbare' kahani par kendrit Gulzar ki is chauthi nazm ke bare mein jise apana svar diya hai Nana Patekar ne .

Purane din, purani yaden kisi bhi kavi man ki mahattvapoorn khurak hoti hai. Bite huye lamahon mein huee har ik chhoti badi baat ko yaad rakhna to shayad ham mein se kaiyon ka priy shagal hoga. Par un baaton ko shabdon ke canvas par bakhoobi utar pana ki vo seedhe dil ko bindhati chali jaye Gulzar ke hi bas ki baat hai. Nana Patekar jab apani gahari aawaz mein bas itna sa kahte hain

tere utare huye din tange hain lawn mein ab tak
na vo purane huye hain na unka rang utra
kahin se koee bhi sivan abhi nahin udhdi
to hamari apani purani yadon ke kuchh band daravaze to anayas khul hi jate hain. Gulzar ka ye andaz bhi dil ko karib se chhoo jata hai
gilahariyon ko bulakar khilata hoon biskut
gilahariyan mujhe shaq ki nazaron se dekhti hain
vo tere hathon ka mass jaanti hongi...
To sunein Nana Patekar ki aawaz mein ye nazm



Darasal nazmon ko padana bhi ek kala se kam nahin hai Gulzar ko jitna padhna pasand aata hai utna hi unhein sunna. Yahi khasiyat Amitabh ji mein bhi hai. Waise kuchh shabdon ke uchcharan ko agar nazaraandaj kar den to Nana Patekar ne bhi nazm ki bhavanaon ko aatmasat kar ise padha hai.




tere utare huye din tange hain lawn mein ab tak
na vo purane huye hain na unka rang utra
kahin se koee bhi sivan abhi nahin udhdi

ilayachi ke bahut paas rakhe patthar par
zara si jaldi sarak aaya karati hai chhanv
zara sa aur ghana ho gaya hai vo paudha
main thoda thoda vo gamla hatata rahta hoon
fakira ab bhi vahin meri coffee deta hai
gilahariyon ko bulakar khilata hoon biskut
gilahariyan mujhe shak ki nazaron se dekhti hain
vo tere hathon ka mass janati hongi...

kabhi kabhi jab utarti hain cheel sham ki chhat se
thaki thaki si zara der lawnn mein rukkar
safed aur gulabi mussaende ke paudhon mein ghulane lagti hai
ki jaise barf ka tukada pighalata jaye whiski mein
main scarf ..... gale se utar deta hoon
tere utare huye din pahan kar ab bhi main teri mahak mein kaee roz kat deta hoon

tere utare huye din tange hain lawn mein ab tak
na vo purane huye hain na unka rang utra
kahin se koee bhi sivan abhi nahin udhdi